Soepwandeling

Foto's van de soepwandeling

In 't neisblad har ik lezen dat er dunderdag 30 december een dörpswandeling deur Gies maakt zul worden en dat de start zul wezen in café Bussemaker. Toen ik dat tegen mien vrouw zee was dèr gien hollen meer an. Wej gaot met die wandeling met. Via T.I.P. gaven wej oez op en dus togen wej die dönderdag tegen half elf op Gies an. Een groot bord stund veur de deur. Het kun niet missen. Collega campingbaos Frits Elders zag ik al veur de deur staon en ok al wat volk van T.I.P.. Dus kundigheid genog. Now moej weten dat mien vrouw (Jannie Weggemans, dochter van Willem Weggemans en Henderika Eising) heur overgrootmoe Bussemaker heette en daor in't café geboren is. Toen zei dit an een stuk of wat vrouwluu kundig maakte weur der metien zegt dat zij dan eev'n met Jan mus praoten. Jan zat in de kamer.. Now volk,wat er toen allemaol op taofel kwam kan ik wal een kraant met vol schrieven mor dat doe'k now niet. Nao een kop koffie gungen wij an de loop.

Het was een prachtige dag. De snej lag nog op de bomen en de riep hung an de takken. Een ieder geneut. De groep weur in twejen dielt en zo kuierden wij deur Gies. Van alles weur oez verteld. Over de gerifformeerde kerk, het Jeudenhoes. Waor ok nog een boerderij had staon en waor de schoel had staon en nog veul meer. Mor zo opiens kwamen wij binnen in een schuurtie waor geweldig mooie olle motorfietsen stunnen. Merakels wat dizze man weer veur mekaar maakt. Ik heb gien verstaand van motors en zo, mor dat er mensen bint die dit fantastisch vindt kan ik mij veurstellen. Zo kwamen wij ok zoas dér zegt weur bij het "neije Gies" Just British. Aj liefhebber bint van dit Engels spul dan kunj hier goed terecht. Toen kwamen wij weer in de Oude Steeg. Ik stel now veur um dizze straotnaam te veraanderen in Olle Steeg.

Veur mien gevuul past dit veul beter. Ooit kwam ik hier veul vaker. Mien tante Gees woonde in Gees. Zij was de oma van Johan Tietema, waor wij ok op de stal meugen kieken. Oeze gids vertelde dat er nog twij boeren bint in Gies en Johan is daor iene van. Ik vind het geweldig zoas Johan over zien bedrief prat. Niet allent mor um de melk mor ok um het gerief van de koeien. As een koe zich goed vuult, dan gef zij meer melk. Dat is net as bij mensen. Aj met plezeer naor je wark gaot, dan vuul ej je veul beter. Mettertied kwamen wij an 't einde van 't darp. Ezels leupen in de wei, grote hoender met een bult veren an de poten waren de'r ok en nog veul meer van dat kleinvee.Ok schilderde oeze gastvroew. Veural koenen, geiten en peerde . Toen wij weer op straot kwamen stun Lucas Zwaan oes op te wachten met de huifkar en zo weuren wij weer naor 't café bracht. Volk, ej wilt niet weten, mor de vrouwluu van T.I.P. hadden mij daor toch lekkere snert maakt. Veur elk was dèr meer dan genog en ok nog een kedettie en tot slot kregen wij ok nog een puuttie met rollechies. Wij hebt een geweldige dag had die dönderdag. Volk bedankt!

De mensen gungen hen hoes, mor wij nog niet. Wij kwamen bij Jan Lanting in de kamer en elke keer kwaam er weer een aandere couvert met foto's oet kamnet. Jao , zulfs nog een bakkie met olle gereedschappen dat smid Bussemaker zulf maakt har um bij de mensen die koezenzeert hadden de koezen te trekken. Wij waren laat weer in hoes.

Geert W. Smegen.